ഫ്യൂഡലിസം_സാമ്പത്തികവും_രാഷ്ട്രീയവും

1) #അടിമത്തത്തിന്റെ_തകർച്ചയും_ഫ്യൂഡൽസാമൂഹ്യക്രമത്തിന്റെ_ആവിർഭാവവും..

മനുഷ്യരാശിയുടെ ചരിത്രപുരോഗതിയിൽ അടിമത്തസമൂഹങ്ങൾ വഹിച്ചിരുന്ന നിർണായകമായ പങ്ക് വ്യക്തമാണ്.. ഓരോ സാമൂഹ്യവ്യവസ്ഥിതിയിലും ഉത്പാദനശക്തികളുടെ വളർച്ച അനുസ്യൂതം തുടരുമ്പോഴും അവയിൽ നിലനിൽക്കുന്ന സാമ്പത്തികബന്ധങ്ങൾ ആ വളർച്ചയെ അസ്ഥിരപ്പെടുത്തുന്നതായി കാണാം. ശാസ്ത്രസാങ്കേതികരംഗത്തും കലാസാംസ്കാരികമേഖലകളിലും അടിമത്തകാലഘട്ടങ്ങളിൽ ലോകം കൈവരിച്ച പുരോഗതി എണ്ണിത്തീർക്കാൻ കഴിയാത്തതാണ്. അടിമകളെയും പണിയാളരെയും ഒക്കെ ഉപയോഗിച്ച് ക്രൂരമായി പണിയെടുപ്പിച്ചും അടിമച്ചന്തകളിലും അല്ലാതെയുമുള്ള കൊള്ളവ്യാപാരങ്ങളിലൂടെയും ഉടമവർഗം സമ്പത്തും അധികാരവും തങ്ങളിലേക്ക് കേന്ദ്രീകരിക്കുകയാണുണ്ടായത്. ഉത്പാദനം വർധിക്കുകയും പുതിയ ഉത്പാദനമാർഗങ്ങളും കണ്ടെത്തലുകളും വിജ്ഞാനങ്ങളും ആവിർഭവിക്കുകയും ചെയ്തു.
                 എന്നാൽ അടിമത്തത്തിൽ അധിഷ്ഠിതമായ വർഗബന്ധങ്ങൾ ഉത്പാദകശക്തികളുടെ വളർച്ചയെ നിരുത്സാഹപ്പെടുത്തുകയും ഉത്പാദനോപാധികളും ഉത്പാദകബന്ധങ്ങളും തമ്മിലെ പൊരുത്തക്കേടുകൾ ഉയർന്നുവരികയും ചെയ്തു. ചൂഷണവും വ്യാപാരമിച്ചവും തുടരുകയും കാർഷിക -ഖനന മേഖലകളിൽ ഉൾപെടെ വളർച്ചയുണ്ടാകുകയും ചെയ്തു. എന്നാൽ ഇത്തരത്തിൽ വമ്പിച്ച വികാസം പ്രാപിച്ച ഉത്പാദനോപാധികൾ ഉപയോഗിക്കാനുള്ള പ്രേരണയോ നൈപുണ്യമോ അടിമകൾക്ക് ഇല്ലായിരുന്നു. അടിമകളുടെ കലാപങ്ങളെ അടിച്ചമർത്തി വർഗാധിപത്യത്തെ സംരക്ഷിച്ചുനിർത്താൻ ഉടമകൾക്കും ഭരണവർഗത്തിനും കഴിഞ്ഞെങ്കിലും ചാട്ടവാറുപയോഗിച്ച് മാത്രം അടിമകളെ പണിയെടുപ്പിച്ച് ഉത്പാദനവളർച്ച നിലനിർത്താനാവില്ലെന്ന സ്ഥിതി സംജാതമായി. തൊഴിലെടുക്കുന്നവർ ഉത്പാദനമേഖലയിൽ സ്വയം മുൻകൈയെടുക്കുകയും സ്വന്തം തീരുമാനങ്ങളുടെ കൂടി അടിസ്ഥാനത്തിൽ അധ്വാനത്തിലേർപെടുകയും ചെയ്യേണ്ടത് സമ്പദ്ഘടനയുടെ നിലനിൽപിന് തന്നെ അത്യാവശ്യമായി വന്നു.
   
                    മുൻകാലങ്ങളിൽ നിന്നും വ്യത്യസ്തമായി ഉത്പാദനോപാധികളും സാങ്കേതികരംഗവും വലിയ തോതിൽ വികാസം പ്രാപിച്ചതായിരുന്നു ഇതിന് കാരണമെന്ന് കാണാം. കാർഷിക- വ്യവസായമേഖലകളായി സമ്പദ്ഘടന വേർപിരിയുകയും കൃഷി വൻകിട- കൃഷിയിടങ്ങളായി മാറുകയും ചെയ്തു. Large scale ആയ കൃഷിയിടങ്ങളും അനുബന്ധമേഖലകളും അടിമകളുടെ അധ്വാനവിനിയോഗം ഉത്പാദനശോഷണത്തിന് കാരണമാകാനാണ് ഇടയാക്കിയത്. ശാസ്ത്രസാങ്കേതികപുരോഗതികൾ അടിമകളുടെ അധ്വാനത്തെ ലഘൂകരിക്കുമായിരുന്നു, കഠിനജോലികളിൽ നിന്ന് അവർ സ്വതന്ത്രരുമായേനെ. എന്നാൽ ഉടമവർഗം അടിമകളെ കൂടുതൽ ചൂഷണം ചെയ്യുകയും ശാസ്ത്രസാങ്കേതിക ഉപാധികളുടെ ആവശ്യകത മുരടിക്കുകയും ചെയ്തു. ബലാൽക്കാരമായി  അടിമകളെ ഉപയോഗിച്ച് വിലകൂടിയതും തൊഴിൽനൈപുണ്യവും പ്രവർത്തനരംഗത്തെ വൈദഗ്ധ്യവും ഒക്കെ ആവശ്യമായിരുന്ന ഉത്പാദനോപാധികളും ഉപകരണങ്ങളും പ്രവർത്തിപ്പിക്കുക എന്നതും അപ്രായോഗികമായിരുന്നു.

                      അടിമത്തത്തിന്റെ സാമ്പത്തികാടിത്തറയിൽ തന്നെ ഉടലെടുത്ത ഇത്തരം വൈരുധ്യങ്ങൾ ഉത്പാദകബന്ധങ്ങളുടെ വിപ്ലവകരമായ ഉടച്ചുവാർക്കലിനെ അനിവാര്യമാക്കുകയാണ് ചെയ്തത്. റോമിലും നൈൽതടങ്ങളിലും ഏഷ്യാമൈനറിലും ഗ്രീസിലുമൊക്കെ ഒട്ടേറെ അടിമകലാപങ്ങളും വിപ്ലവങ്ങളും അരങ്ങേറി. സ്പാർട്ടക്കസിനെ പോലുള്ളവരുടെ ചരിത്രപരമായ പോരാട്ടങ്ങൾ ഉദാഹരണം. പലയിടത്തും അടിമവംശങ്ങൾ ഭരണം സ്ഥാപിച്ചു. മേലാളവർഗം അവയെയെല്ലാം അടിച്ചമർത്തിയെങ്കിലും വ്യവസ്ഥാപരമായ പ്രതിസന്ധികളും വർഗസമരത്തിന്റെ വ്യാപനവും കൂടുതൽ അടിമലഹളകളിലേക്ക് നയിച്ചു. പരാജയപ്പെട്ട വിപ്ലവങ്ങൾ വരാനിരിക്കുന്ന പുതിയ ലോകോദയത്തിനു മുമ്പുള്ള ശംഖുനാദങ്ങൾ മാത്രമായിരുന്നെന്ന് ചരിത്രം തെളിയിച്ചു. വളർന്നുവികസിച്ച ഉത്പാദനോപാധികൾക്കനുസൃതമായി അടിമത്തവ്യവസ്ഥ തകർന്നടിയുകയും ഫ്യൂഡലിസം എന്ന പുതിയൊരു സാമൂഹ്യഘടന രൂപംകൊള്ളുകയും ചെയ്തു.

2) #ഫ്യൂഡലിസത്തിന്റെ_വർഗബന്ധങ്ങൾ

           അടിമകൾക്ക് ഉത്പാദനപ്രക്രിയയിൽ സ്വന്തമായി തീരുമാനങ്ങളെടുക്കാനോ ഉപകരണങ്ങളും വിഭവങ്ങളും അറിവുകളും കൈകാര്യം ചെയ്യാനോ ഉള്ള സ്വാതന്ത്ര്യം ഉണ്ടായിരുന്നില്ലെങ്കിൽ ഫ്യൂഡൽ സമൂഹങ്ങളിലെ പണിയാളർക്കും കുടിയാൻമാർക്കും (Serfs) ഇത് സാധ്യമായിരുന്നു. അധ്വാനിക്കുന്നവൻ അധ്വാനവുമായി സ്വയം താദാത്മ്യം പ്രാപിച്ചു. സ്വകാര്യസ്വത്തിന്റെ പ്രാഥമികരൂപമായിരുന്ന ഭൂമി ഭൂപ്രഭുക്കന്മാരുടെ കുത്തകാധികാരത്തിന് കീഴിലായിരുന്നു. ഭൂപ്രഭുവുമായുള്ള ധാരണയുടെ അടിസ്ഥാനത്തിൽ ഉത്പാദനത്തിന് മുൻകൈയെടുക്കാനും വേണ്ടവിധം ഭൂസ്വത്തിനെ കാർഷികോത്പാദനത്തിനായി ഉപയോഗപ്പെടുത്താനും കർഷകർക്ക് കഴിയുന്നു. താൻ ഉത്പാദിപ്പിക്കുന്ന സ്വത്തിന്റെ വലിയൊരുഭാഗം ഭൂവുടമയ്ക്ക് /ജന്മിക്ക് പാട്ടമായി നൽകാൻ പണിയെടുക്കുന്നവർ നിർബന്ധിതരായിരുന്നു.
             
                 അടിമത്തത്തിനു സമാനമായ ചൂഷണാധിഷ്ഠിത സാഹചര്യങ്ങൾ ഫ്യൂഡൽ വ്യവസ്ഥയിലും തുടർന്നുവെങ്കിലും കീഴാളവർഗത്തിന്റെ സ്വന്തം താത്പര്യങ്ങൾക്കും സ്വയം നിർണയാധികാരങ്ങൾക്കും സാധുത നൽകുന്നിടത്താണ് ഫ്യൂഡലിസം അടിമത്തത്തെ അപേക്ഷിച്ച് അൽപം പുരോഗമനസ്വഭാവം പുലർത്തുന്നത്. ഫ്യൂഡൽ സമൂഹങ്ങൾ പല ദേശങ്ങളിൽ പല സ്വഭാവങ്ങളാണ്  പുലർത്തിയിരുന്നത്. ഇന്ത്യയിലെ ജന്മിത്തത്തിനു കീഴിൽ കർഷകർ നിർദയം പണിയെടുക്കുകയും ചൂഷണത്തിന് വിധേയരാവുകയും തോന്നുംപടി കുടിയിറക്കപ്പെടുകയും ഒക്കെ ചെയ്യുന്നത് സാധാരണമായിരുന്നു. വലിയ തോതിൽ ഇക്കാലയളവിൽ സമ്പത്ത് ഉത്പാദിപ്പിക്കപ്പെടുകയും ജന്മി -ഭൂപ്രഭുവർഗവും (Land lords) അവരുടെ സംരക്ഷകരായിരുന്ന ഭരണവർഗവും മതപൗരോഹിത്യവും ചൂഷണമുതൽ തിന്നുകൊഴുക്കുകയും ചെയ്തു. കുടിയാന്മാരുടെയും കുടുംബത്തിന്റെ ജീവനാവശ്യങ്ങൾക്ക് വേണ്ടി ചെറിയൊരംശം ഉത്പാദനമിച്ചവും ഭൂമിയും കുടിയാന് നീക്കിവെച്ചിരുന്നു.

                 നിർബന്ധിതമായി പണിയെടുപ്പിക്കാനോ, പണിക്കാരെ കൈമാറാനോ കുടിയിറക്കാനോ ഒക്കെ വ്യവസ്ഥകൾ ഉണ്ടായിരുന്നെങ്കിലും ഉപരിവർഗത്തിന്റെ അവർക്കുമേലുള്ള അധികാരം ഭാഗികമായിരുന്നു, കീഴാളരെ കൊല്ലുന്നതും പൊതുസമൂഹത്തിൽ നിരുത്സാഹപ്പെടുത്തുകയോ വിലക്കുകയോ ചെയ്തിരുന്നു. കൈത്തറിശാലകളും വ്യക്തിഗതഅധ്വാനത്തിന് ആവശ്യമായ ഉപകരണങ്ങളുമൊക്കെ തൊഴിലാളികൾക്ക് സ്വന്തമായി ഉണ്ടായിരുന്നെങ്കിലും അതിന്റെ ഫലവും ഉത്പാദനമിച്ചവും ഒക്കെ കൈപ്പറ്റാനുള്ള അവകാശം അടിയാളന്മാർക്ക് അന്യമായിരുന്നു. ഫ്യൂഡൽ സ്ഥാപനങ്ങൾ ലോകത്തെല്ലായിടങ്ങളിലും ഏകതാനമായ സ്വഭാവമാണ് പുലർത്തിയത് എന്നു കരുതരുത്.  ഉത്പാദകബന്ധങ്ങളിലെ അടിസ്ഥാനസവിശേഷതകൾ ഒഴിച്ചാൽ വർഗസ്വഭാവങ്ങളിലും ഭൗതികപരിസ്ഥിതിയിലുമൊക്കെ കാര്യമായ വ്യത്യാസങ്ങൾ നിലനിന്നിരുന്നു. കുടിയാൻ, വാടകക്കാർ, കൃഷി മാനേജർമാർ തുടങ്ങിയ വർഗങ്ങൾ സമൂഹത്തിൽ രൂപംകൊണ്ടു. ഭൂമിയെയും പണിയായുധങ്ങളെയും മറ്റ് സ്ഥാവര ജംഗമസാമഗ്രികളെയും പണിയാളർ നല്ലവണ്ണം പരിപാലിച്ചു. അവയെ പരിഷ്കരിച്ച് ഉപയോഗിക്കാനും അവർക്ക് കഴിഞ്ഞു.

3) #ഉത്പാദനോപാധികളുടെയും_ശാസ്ത്രസാങ്കേതികവിദ്യകളുടെയും_വികാസം..
                 
                 കാർഷിക- വ്യവസായിക- വാണിജ്യമേഖലകളിൽ വലിയ പുരോഗതികൾ യൂറോപ്പ് കൈവരിച്ചു. ഭൂമി കൈവശം വെച്ചിരുന്നത് ഭൂപ്രഭുക്കന്മാരാണ്.  യന്ത്രസാങ്കേതികവിദ്യകളും നൂതനമായ ഉപകരണങ്ങളിലും കൂടാതെ, ശാസ്ത്ര- വൈജ്ഞാനികമേഖലകളിലും ഫ്യൂഡൽ സമൂഹങ്ങൾ ലോകമെമ്പാടും കൈവരിച്ച പുരോഗതി വിസ്മരിക്കാനാവില്ല. ഇരുമ്പ് വ്യവസായവും കൈത്തറിയും സാമ്പത്തികപുരോഗതിയെ വേഗത്തിലാക്കി. രാഷ്ട്രീയത്തിലും ഭരണകൂടത്തിലും കലാസാംസ്കാരിക ഘടനകളിലുമൊക്കെ പുതിയ ചരിത്രബന്ധിതമായ മാറ്റങ്ങൾ ഉടലെടുക്കാനും അനുരണനങ്ങൾ സൃഷ്ടിക്കപ്പെടാനും ഇത് കാരണമായി. ചൂഷണാധിഷ്ഠിതമായ ഉത്പാദകബന്ധങ്ങളിൽ ഉത്പാദനോപാധികൾ വലിയ വളർച്ച പ്രാപിച്ചു. തൊഴിൽവിഭജനവും വ്യാപകമായി മാറി. ഉത്പാദനക്ഷമതയും വർധിച്ചു. വളം, കീടനാശിനികൾ, നൂതനമായ ഗതാഗതസൗകര്യങ്ങൾ, മില്ലുകൾ, പേപ്പർ വ്യവസായം, വെടിമരുന്ന്, പ്രിന്റിംങ് തുടങ്ങി എത്രയോ ഉദാഹരണങ്ങൾ.. ഉത്പാദനം വർധിച്ചു, വാണിജ്യവും തത്ഫലമായി വികാസം പ്രാപിച്ചു. വൻനഗരങ്ങളും വ്യവസായശാലകളും യൂറോപ്പിൽ രൂപംകൊണ്ടു.

4) #കുടുംബം_മതം_ഭരണകൂടം

               കുടുംബങ്ങൾ കൂടുതൽ പുരുഷാധികാരകേന്ദ്രങ്ങളായി മാറുന്നു.ഉന്നതകുടുംബത്തിലെ സ്ത്രീകൾ പോലും  കേവലം ലൈംഗികോപകരണങ്ങളും അടുക്കളച്ചക്കികളും മാത്രമായി ഒതുങ്ങിക്കൂടുന്ന ഇരുണ്ട കാലഘട്ടം ഭാരതത്തിലുൾപെടെ നിലനിന്നിരുന്നതായി കാണാം. സന്താനോത്പാദനവും ഗാർഹികവൃത്തിയും സ്ത്രീയുടെ കടമകളായി സ്ഥാപനവത്കരിക്കപ്പെട്ടു.. ഫ്യൂഡലിസത്തിലെ അധ്വാനവർഗത്തിനു മേലുള്ള ചൂഷണഫലമായി സമൂഹത്തിലെ ഒരു ന്യൂനപക്ഷത്തിലേക്ക് സ്വത്ത് കുന്നുകൂടി. ഇതാവട്ടെ കുടുംബത്തിലെ പുരുഷന്മാരുടെ അധികാരപരിധിയിലായിരുന്നു. കീഴാളജനതകൾക്കിടയിലും സ്ത്രീ രണ്ടാംകിടപൗരയായി പാർശ്വവത്കരിക്കപ്പെട്ടു. മേലാളവർഗത്തിന്റെ ലൈംഗികചൂഷണങ്ങൾക്കുപോലും അവർ വിധേയരായി. ജന്മിയെ ഊട്ടിപ്പോറ്റേണ്ട അടിയാളരെ പെറ്റുകൂട്ടുന്നവർ മാത്രമായി സ്ത്രീസമൂഹം അധഃപതിച്ചു. സമൂഹത്തിലെ മുഖ്യധാരയിലും സാമ്പത്തികോത്പാദന പ്രക്രിയകളിലും സ്ത്രീക്ക് അവസരങ്ങൾ നിഷേധിക്കപ്പെട്ടു.
                 
                     ഭൂപ്രഭുക്കന്മാരുടെയും ഭരണവർഗത്തിന്റെയും ചൂഷകതാത്പര്യങ്ങളെയും സ്ത്രീവിരുദ്ധ , മാനവികവിരുദ്ധമൂല്യങ്ങളെയും പ്രതിഫലിപ്പിക്കുകയാണ് മതശാസനങ്ങളും മതപൗരോഹിത്യവും ചെയ്ത്. ഫ്രഞ്ച് വിപ്ലവത്തിന് മുമ്പുള്ള ഫ്രാൻസിലും ഇതര യൂറോപ്യൻ ദേശങ്ങളിലും അധികാരം കയ്യാളിയിരുന്ന രാജകുടുംബങ്ങളോടൊപ്പമോ അവർക്ക് മേലെയോ ആയിരുന്നു പുരോഹിതന്മാരുടെ സ്ഥാനം. പുരോഹിതർ, രാജാവ്, ഭൂപ്രഭു, നഗരവാസികൾ എന്നിങ്ങനെ പല എസ്റ്റേറ്റുകളായി സമൂഹം വിഭജിക്കപ്പെട്ടിരുന്നു.  യൂറോപ്പിലാകമാനം ഫ്യൂഡലിസം സ്ഥാപനവത്കരിക്കപ്പെട്ടു. ഭരണകൂടങ്ങളും സൈന്യവും മറ്റെല്ലാ സാംസ്കാരികസ്ഥാപനങ്ങളും ഉപരിവർഗത്തിന്റെയും അവരുയർത്തിപ്പിടിച്ച മൂല്യബോധങ്ങളുടെയും സംരക്ഷകരായി മാറി.
                  യൂറോപ്പിൽ ഫ്യൂഡലിസത്തിന്റെ കീഴിൽ സമൂഹം എസ്റ്റേറ്റുകളായി വിഭജിക്കപ്പെട്ടിരുന്നു. അതിലെ ഏറ്റവും താഴെത്തട്ടിലുള്ള നഗരവാസികൾക്ക് വോട്ടവകാശം പോലും നിഷേധിക്കപ്പെട്ടിരുന്നു. ഭരണസഭകളിലെ അർഹമായ പ്രാതിനിധ്യത്തിനും സാമ്പത്തികോത്പാദനത്തിലും പൊതുസമൂഹ വ്യവഹാരങ്ങളിലും വേണ്ട സ്വാതന്ത്ര്യത്തിനും സമത്വത്തിനും വേണ്ടി ഫ്രാൻസിലെ നഗരവാസികൾ മുറവിളി കൂട്ടി. ഇവരാണ് #ബൂർഷ്വാസി എന്നറിപ്പെട്ടത്. മാറ്റമില്ലാതെ തുടർന്ന ഫ്യൂഡൽ ഉത്പാദകബന്ധങ്ങൾ സാമ്പത്തികവളർച്ചയ്ക്കും ഉത്പാദനോപാധികളുടെ വികാസത്തിനും ഘടനാപരമായ പ്രതിസന്ധികൾ സൃഷ്ടിച്ചു. മാർക്സ് നിരീക്ഷിച്ചതുപോലെ പഴയ സാമൂഹ്യവ്യവസ്ഥയിലെ ആന്തരികവൈരുധ്യങ്ങൾ അതിന്റെ നിലനിൽപിന് ഭീഷണിയാവുകയും അതിന്റെയുള്ളിൽ ബൂർഷ്വാസി കെട്ടിപ്പടുക്കാൻ പോകുന്ന പുതിയ ലോകക്രമത്തിന്റെ ബീജം മുളപൊട്ടുകയും ചെയ്തു. ഫ്യൂഡൽ സാമൂഹ്യക്രമത്തിനെതിരായ വർഗസമരങ്ങൾ വലിയ കലാപങ്ങളിലേക്കും വിപ്ലവങ്ങളിലേക്കും പുതിയ പുരോഗമന ആശയങ്ങളിലേക്കും ലോകത്തെ ചലിപ്പിച്ചെന്ന് ചുരുക്കം..

(അടുത്ത ലേഖനം - ഫ്യൂഡൽവിരുദ്ധ വിപ്ലവങ്ങൾ, ബൂർഷ്വാസി, ആധുനിക തൊഴിലാളിവർഗം..)