വർഗബോധം

മുതലാളിത്തം എല്ലാ മനുഷ്യരിലും ചെലുത്തുന്ന ചില ശീലങ്ങളും സ്വഭാവങ്ങളുമുണ്ട്.. അത്യാഗ്രഹം, സ്വാർത്ഥത, കുറുക്കവഴിയിലൂടെ സമ്പത്ത് നേടാനുള്ള വ്യഗ്രത, മതബോധത്തിലൂടെ ചെലുത്തുന്ന നിഷ്ക്രിയത്വം, വർഗീയമായ ഭിന്നിപ്പുകൾ തുടങ്ങിയവ.. ഇത് തൊഴിലാളികളിൽ നിന്നും അകന്നുപോകണമെങ്കിൽ അവരിൽ ഉണ്ടാകേണ്ട ഒന്നാണ് വർഗബോധം.

കയ്യിൽ മൂലധനമില്ലാതെ അധ്വാനം വിറ്റ് ജീവിക്കുക, വമ്പിച്ച ചൂഷണങ്ങൾക്ക് വിധേയരാവുക, കലയും മാനുഷികബന്ധങ്ങളും  എന്തിനേറെ പറയുന്നു, ലൈംഗികത പോലും വിൽപനച്ചരക്കാകുക, ഭരണകൂടവും നിയമവും ഉൾപെടെ സകല പ്രസ്ഥാനങ്ങളും ബൂർഷ്വാസിയുടെ ചട്ടുകമായി മാറുക, കൂലി അടിമത്തം ശക്തമാകുക.. ഇതെല്ലാം തൊഴിലാളിയെ ദുരിതത്തിലാഴ്ത്തും. സമ്പന്നനും ദരിദ്രനും തമ്മിലെ അന്തരം വർധിപ്പിക്കും.. അടിച്ചമർത്തപ്പെട്ടവരുടെ ജീവിതസാഹചര്യങ്ങൾ ഒരുപോലെയാകും.. അസംതൃപ്തിയും പടരും.. ഒരുപോലുള്ള ജീവിതസാഹചര്യങ്ങൾ അവരെ ഒരേ ദിശയിലേക്ക് ചിന്തിക്കാൻ പ്രേരിപ്പിക്കും.. ചിന്തകൾ ഏകീകരിക്കപ്പെടും.. മുതലാളിവർഗവും തൊഴിലാളിവർഗവും തമ്മിലെ ഈ വൈരുധ്യം വർധിക്കുകയും, വർഗസമരം രൂക്ഷമാകുകയും ചെയ്യും..

മുതലാളിത്തലോകത്ത് ചൂഷണം ചെയ്യപ്പെടുന്നത് തൊഴിലാളികൾ മാത്രമല്ല,  ആദിവാസികൾ, സ്ത്രീകൾ തുടങ്ങിയ വർഗങ്ങളും ഉൾപെടും.. പരിസ്ഥിതിപ്രവർത്തകരും നവോത്ഥാനപ്രസ്ഥാനങ്ങളുമെല്ലാം നിലവിലെ ദുഷിച്ച വ്യവസ്ഥിതിക്കെതിരെ ശബ്ദമുയർത്തും. എന്നാൽ അതിന് നേതൃത്വം നൽകാൻ കഴിയുന്നതും ദാർശനികമായും ഭൗതികമായും കരുത്തുള്ളതും ആധുനികതൊഴിലാളിവർഗത്തിനു മാത്രമാണ്..